బీసీలంతా ఒక్కటి అన్నారు..

రాజ్యాధికారం మనదే అన్నారు..

రాజకీయాలను శాసిస్తాం అన్నారు..

మరో కొత్త శకం మొదలైంది..

మేధావుల పోరాటాన్ని గుంజుకున్నారు..

తీరా.. అసలు టైంకి కాడి ఎత్తేశారు..

వీళ్లే బీసీ పెద్దలు.. అసలైన గద్దలు..

పోరాటాన్ని పెద్దల్లో కలిపిన సుద్దపూసలు..

ఒకామె బీసీ నినాదమెత్తుకుంటే జై కొట్టిండ్రు..

ఒకాయన 42% అనంగనే పాలు ఒల్కవోసిర్రు..

ఆహా.. ఓహో.. చారిత్రక నిర్ణయం అన్నారు..

ఒక్క దెబ్బకు బీసీల బతుకు మారిందన్నారు..

కోర్టులు ఊహూ.. అనంగనే తుస్సుమన్నరు..

కనీస పోరాటం మరిచి మూలుగుతున్నారు..

మళ్లీ అదే తంతు.. పెరగడానికి బీసీల 'వంతు'..

రిజర్వేషన్లు సాధించడంలో బీసీలు ఎందుకు ఫెయిల్ అవుతున్నారు? అంటే.. ఫస్ట్‌ ఆన్సర్‌ ఐక్యత లేకపోవడమే. ఇదే అన్ని రాజకీయ పార్టీలకు ఆయుధమైంది. ఆ ఆయుధాన్నే అన్ని పార్టీలు ప్రయోగిస్తున్నాయి. ఆశ పెట్టి, అత్యాశ చూపి.. అమాంతం ఆకాశం నుంచి విడిచిపెట్టేస్తేగానీ అర్థం కావడం లేదు. కులగణన సర్వే ప్రకారం తీసుకుంటే.. రాష్ట్రంలో మొత్తంగా ఉన్న బీసీలు 56.33 శాతం (ముస్లింలతో కలిపి). ముస్లిమేతరులు 46.25 శాతం(1,64,09,179 మంది). బీసీలకు దక్కాల్సిన వాటా ఎంత? దక్కుతున్నదెంత? బీసీ నాయకులు డిమాండ్ చేస్తున్నదెంత? ప్రభుత్వాలు ఇస్తామంటున్నదెంత? ఈ విషయాలపై మాట్లాడేందుకు బీసీ నేతలకు నోరు రాదు. అడిగే అంత ధైర్యమూ చేయరు. ఒక నాయకుడు వచ్చి తాను బీసీల పక్షాన ఉంటానంటే.. పుల్లలు పెట్టే ప్రబుద్ధులు ఎందరో..! పెద్ద కులపోళ్లు 'నోడి కాడ ఇంత ముక్క' వేయంగానే సింగులు సర్ధుకొని సప్పుడు చేయకుండా ఉన్న పరమనీచులు ఇంకెందరో..!

తెలంగాణ ప్రభుత్వం స్థానిక సంస్థల్లో బీసీలకు 42 శాతం రిజర్వేషన్లు కల్పిస్తూ జీవో నం.9 జారీ చేసినప్పటికీ, న్యాయ సమీక్షను తట్టుకోలేకపోయింది. సుప్రీంకోర్టు మార్గదర్శకాల ప్రకారం, ఎస్సీ, ఎస్టీ, బీసీ వర్గాలకు కలిపి మొత్తం రిజర్వేషన్లు 50 మించకూడదు. 42% రిజర్వేషన్లను అమలు చేయాలంటే, ఈ 50% పరిమితిని అధిగమించాల్సి వస్తుంది. దీనికి అనుగుణంగా చట్ట సవరణలు లేదా రాజ్యాంగంలోని 9వ షెడ్యూల్‌లో చేర్చడం వంటి సాధారణ ప్రక్రియలు అవసరం. అయితే, ఈ న్యాయపరమైన సవాళ్లను సమర్థంగా ఎదుర్కోవడంలో ప్రభుత్వంతో పాటు, బీసీ సంఘాల నుంచి బలమైన, ఏకగ్రీవమైన న్యాయవాద లోపించింది. రిజర్వేషన్ల సాధనలో బీసీలు ఎదుర్కొంటున్న అతి పెద్ద సవాలు వారి మధ్య ఐక్యత లేకపోవడం. తెలంగాణలో అనేక బీసీ సంఘాలు, జేఏసీలు, ఉమ్మడి లక్ష్యం కోసం ఒకే వేదికపైకి రావడం అరుదు. ప్రతి సంఘానికి ఒక నాయకుడు, వారి వెనుక కొందరు అనుచరులు, వారి వ్యక్తిగత రాజకీయ ఆకాంక్షలు ఉంటాయి. ఇది సామూహిక శక్తిని నీరుగారుస్తోంది. బీసీ వివిధ రాజకీయ పార్టీలలో కీలక స్థానాల్లో, పార్టీ ప్రయోజనాలకే ప్రాధాన్యత ఇస్తున్నారు తప్ప, తమ వర్గ ప్రయోజనాల కోసం పార్టీలకతీతంగా ఐక్యంగా పోరాడలేకపోతున్నారు. ఇక, బీసీల్లోనే వివిధ కులాల మధ్య అంతరాలు, ఆధిపత్య పోరాటాలు ఉన్నాయి. ఇది ఐక్య ఉద్యమానికి అడ్డుపడుతోంది. 'ఎవరికి వారు గొప్ప' అనుకునే వ్యక్తిగత అహంకారాలు, ఆధిపత్య ధోరణులు ఉద్యమాన్ని నీరుగారుస్తున్నాయి. బీసీల్లోని కొందరు నాయకులు తమ సొంత రాజకీయ ఎదుగుదల కోసం, పదవుల కోసం పాకులాడుతూ, బీసీ సామాజిక వర్గం మొత్తం ప్రయోజనాలను పణంగా పెడుతున్నారు. రాజకీయ పార్టీలు కూడా ఈ బలహీనతను తమకు అనుకూలంగా వాడుకుంటూ, బీసీ వర్గాలను చీల్చి, తమ ఓటు బ్యాంకును పటిష్టం చేసుకుంటున్నాయి. రాబోయే స్థానిక ఎన్నికల్లో బీసీ బలం బలహీనమైపోయిందని ఇప్పటికే ఓ క్లారిటీ వచ్చేసింది. ఇది బీసీలకు అవమానం. బీసీ నాయకులకు ఘోర పరాభవం. ప్రభుత్వాన్ని గడగడలాడిస్తాం.. రాష్ట్రాన్ని స్తంభింపజేస్తాం.. మొత్తం అల్లకల్లోలం సృష్టిస్తాం.. అని బీరాలు పలికినవాళ్లు పిచ్చోళ్లైపోయారు. అసలే ఐకమత్యం అంటే ఆమడదూరం ఉండేవాళ్లు బీసీలు. అలాంటి బీసీలను నమ్మి ముందుకు దూకడం సాహసమే. ఆ సాహసానికి పూనుకున్న మేధావులు ఇప్పుడు ఆలోచనలో పడ్డారు. ఈ రాజకీయ నాయకుల వల్ల ఏమీ కావడం లేదని తమవంతుగా ప్రయత్నాలు చేస్తూనే ఉన్నారు. బీసీల్లో చైతన్యాన్ని కలిగించేందుకు ట్రై చేస్తూనే ఉన్నారు.

ఇప్పటికైనా బీసీ ఉద్యమ తీరు మారాలి. కుక్కకు బొక్కేసినట్లు పార్టీలు హామీలు గుప్పించగానే తోక ఊపుకుంటూ పోయే బీసీ నాయకులు తమ తీరు మార్చుకోవాలి. ఒక బీసీ నాయకుడికి అధికారం వస్తే బీసీలు బాగుపడ్డట్లు కాదు. బీసీలంతా బాగుపడాలంటే.. బీసీలంతా ఏకమవ్వాలి అన్న నిజాన్ని గుర్తించినన్ని రోజులు ఇదే పరిస్థితి. కాబట్టి.. వ్యక్తిగత స్వార్థ ప్రయోజనాలను, అహంకారాలను వీడి, ఉమ్మడి లక్ష్యం - 42% రిజర్వేషన్ల సాధన కోసం పార్టీలకతీతంగా ఐక్య పోరాటం చేయాలి. లేదంటే, రాజ్యాధికారంలో తగిన ప్రాధాన్యం లేక, దశాబ్దాలుగా వెనుకలోనే మగ్గిపోవాల్సి వస్తుంది. వివిధ కుల సంఘాలు, ఉపకుల సంఘాలు, రాజకీయ పార్టీలకతీతంగా బీసీలందరినీ ఒకే గొడుగు కిందకు తీసుకురావాలి. ఒక శక్తివంతమైన వేదికను ఏర్పాటు చేయాలి. తమ జనాభా బలం గురించి, రాజ్యాధికారంలో మీకున్న హక్కుల గురించి బీసీ వర్గాలకు పూర్తి స్థాయిలో అవగాహన కల్పించాలి. 'మన జనాభా వాటా 60% ప్లస్, రాజకీయ వాటా ఎంత?' అనే ప్రశ్నను ప్రతి బీసీలో కలిగేలా చేయడంలో విఫలం అవుతున్నారు. దానిపై దృష్టి పెట్టాలి. బీసీ మేధావులు, న్యాయవాదులతో కూడిన ఒక బలమైన న్యాయ పోరాట కమిటీని ఏర్పాటు చేయాలి. సదస్సులు, ప్రెస్ మీట్‌లకే పరిమితం కాకుండా, రాష్ట్రవ్యాప్తంగా నిరసనలు, ధర్నాలు, సభలు, రోడ్ల దిగ్బంధం వంటి కార్యక్రమాలను నిర్వహించాలి. ఈ ఉద్యమాలలో అన్ని వర్గాల భాగస్వామ్యాన్ని ఆహ్వానించాలి. యువతలో, మహిళల్లో నాయకత్వ లక్షణాలను పెంపొందించడానికి శిక్షణ తరగతులను, వర్క్‌షాప్‌లను నిర్వహించాలి. భవిష్యత్ రాజకీయాలకు బీసీ నాయకులను సిద్ధం చేయాలి. పార్టీలకతీతంగా కేంద్ర, రాష్ట్ర ప్రభుత్వాలపై నిరంతరం ఒత్తిడి పెంచాలి.

వేరు కుంపట్లు పోవాలి

బీసీ నాయకులది పూటకో మాట అన్నట్లుగా ఉంది పరిస్థితి. ఎవరికి వారు తామే గొప్ప అన్న రీతిలో ప్రవర్తిస్తూ బీసీ ఉద్యమాన్ని నీరుగారుస్తున్నారు. 42 శాతం రిజర్వేషన్లు ప్రకటించగానే పెద్దలను ఆకాశానికి ఎత్తేశారు కొందరు. అసలు నిజం తెలిసి సైలెంట్ అయిపోయారు. ఇది ఒక ఉద్యమానికి ఉండాల్సిన లక్షణం కాదు. ప్రకటనతోనే ఉద్యమం ఆగిపోకూడదు. లక్ష్యం చేరుకొనేదాకా నిరంతర శ్రమ ఉండాలి. దానికి తగ్గ ప్రణాళిక ఉండాలి. క్రమశిక్షణ కలిగిన నాయకత్వం ఉండాలి. అంటే.. బీసీలకు బీసీల్లో కేసీఆర్ లాంటోడు కావాలి. నాయకుడు చెప్పిన మాట విందాం.. ఆయన బాటలో నడుద్దాం.. అన్న గౌరవం ఉండాలి. చిన్నపాటి భేదాభిప్రాయాలకే వేరు కుంపటి పెట్టాలన్న స్వార్థం పోవాలి. స్వార్థం ఉన్నా ఉద్యమానికి ఎలా ఉపయోగపడుతుంది? అన్న కోణంలో ఆలోచన రావాలి. అప్పుడే బీసీ ఉద్యమం ఉగ్రరూపం దాల్చుతుంది. అగ్రవర్ణాల ఆధిపత్యాన్ని దహించివేస్తుంది.

బీసీ రిజర్వేషన్‌ను నీరుగార్చుతున్నవివే..

- పార్టీలకు అతీతంగా నిలవకపోవడం

- నాయకుల్లో, ప్రజల్లో ఐక్యత లేమి

- ఎవరికి వారు గొప్ప అనుకోవడం

- మా కులం అంటే మా కులం గొప్ప అనుకోవడం

- విభజిత నాయకత్వం

కోర్టులవి మోసాలు కావా?

ఎస్సీలు: 15 శాతం

ఎస్టీలు: 7.5 శాతం

ఓబీసీలు: 27 శాతం

(కలిపితే: 49.5 శాతం)

ఈడబ్ల్యూఎస్: 10 శాతం

మొత్తం: 59.5 శాతం

అంటే.. రిజర్వేషన్లు 59.5 శాతం చేరినట్లే కదా. చట్టాన్ని ఓసారి గుర్తించేందుకు.. ఆర్థికంగా వెనుకబడిన ఓసీలను ఆదుకునేందుకు కేంద్ర ప్రభుత్వం 2019లో 103వ రాజ్యాంగ సవరణ ద్వారా 10 శాతం ఈడబ్ల్యూఎస్‌ రిజర్వేషన్లు తెచ్చుకుంది. ప్రస్తుతం ఎస్సీ, ఎస్టీ, ఓబీసీలు పొందుతున్న రిజర్వేషన్లలో ఎటువంటి మార్పు లేకుండా ఈ చట్టాన్ని రూపొందించారు. అంటే.. ఓపెన్ నుంచి 10 శాతం కల్పించాలి. కానీ, ఇక్కడో కిటుకు ఉంది.. ఈడబ్ల్యూఎస్‌ కింద ఓపెన్‌ నుంచి 10 శాతం రిజర్వేషన్‌ కల్పించడం కాదు.. 100 శాతంలో 10 శాతం రిజర్వేషన్‌ ఈడబ్ల్యూఎస్‌ అమలు చేయడం అన్నమాట. వివరంగా చెప్పాలంటే.. ఓపెన్‌ క్యాటగిరీ కింద ఓసీలకు 5 ఉద్యోగాలు వస్తే.. మొత్తం వందల ఈడబ్ల్యూఎస్‌ అమలు చేయడం ద్వారా 10 ఉద్యోగాలు ఓసీలు లాక్కెళ్లిపోవడం అన్నమాట. ఈ సారాంశాన్ని బట్టి కోర్టులు కూడా బీసీలపట్ల పక్షాన్ని చూపిస్తున్నాయని అర్థం అవపాతం అవుతోంది. మొత్తం రిజర్వేషన్లు 50 మించొద్దు అని అడ్డుపుల్ల వేస్తున్నది. మరి.. ఈడబ్ల్యూఎస్‌ రిజర్వేషన్లు కల్పించే సమయంలో కోర్టులకు సీలింగ్‌ ఎందుకు గుర్తురావడం లేదో మరి. సరేపోనీ.. మన బీసీ నాయకులకు దాన్ని గుర్తు చేయడం రావట్లేదో?

అల్లరి నరేష్ ఆగం
పిన్‌కోడ్‌కు గుడ్‌బై చెప్పండి.. భారత్‌లో కొత్తగా డిజి పిన్