భారతదేశం

ఓయ్-కొరివి జయకుమార్

ప్రచురించబడింది: ఆదివారం, మే 10, 2026, 8:41 [IST]

తమిళనాడు రాజకీయ చరిత్రలో ఒక కొత్త అధ్యాయం మొదలైంది. వెండితెరపై దళపతిగా వెలిగిన విజయ్, ఇప్పుడు నిజ జీవితంలో ప్రజా నాయకుడిగా తన ప్రస్థానాన్ని ఘనంగా ప్రారంభించనున్నారు. దశాబ్దాలుగా రెండు ప్రధాన పార్టీల మధ్య సాగుతున్న పోరును బద్దలు కొడుతూ, విజయ్ మూడో ప్రత్యామ్నాయంగా దూసుకొచ్చారు. ఆయన నియోజకవర్గంలో రికార్డు స్థాయి మెజారిటీతో గెలవడమే కాకుండా, తన అభ్యర్థులను మెజారిటీ స్థానాల్లో గెలిపించుకుని రాజకీయ విశ్లేషకులను సైతం ఆశ్చర్యపరిచారు. యువత, మహిళా ఓటర్లే ​​ఈ భారీ విజయానికి ప్రధాన కారకులుగా నిలిచారు.

తెలుగు రాష్ట్రాల్లో దళపతి మేనియా..

సాధారణంగా తమిళ హీరోలకు తెలుగులో మార్కెట్ ఉండటం సహజం, కానీ విజయ్ విషయంలో అది కేవలం సినిమాకే పరిమితం కాలేదు. ఆంధ్రప్రదేశ్, తెలంగాణ రాష్ట్రాల్లో విజయ్‌కు లక్షలాది మంది అభిమానులు ఉన్నారు. ఆయన రాజకీయాల్లోకి రావాలని ఇక్కడి ఫ్యాన్స్ ఎప్పటి నుంచో కోరుకున్నారు. విజయ్ సాధించిన భారీ విజయంపై తెలుగు రాష్ట్రాల్లో అభిమానులు అధిక సంబరాలు చేసుకున్నారు. "విజయ్ కేవలం తమిళనాడుకే కాదు, సౌత్ ఇండియా మొత్తానికి గర్వకారణం" అని ఇక్కడి అభిమానులు సోషల్ మీడియాలో ట్రెండ్ చేస్తున్నారు.

ఈరోజు తమిళనాడు ముఖ్యమంత్రిగా విజయ్ బాధ్యతలు చేపట్టనున్న నేపథ్యంలో ఆయన గతంలో చేసిన ఒక తెలుగు ప్రసంగం ఇప్పుడు సోషల్ మీడియాలో వైరల్‌గా మారింది. 2012లో జరిగిన 'తుపాకి' సినిమా ఈవెంట్‌లో విజయ్ అనర్గళంగా తెలుగులో మాట్లాడి అందరినీ ఆశ్చర్యపరిచారు. తెలుగు ప్రేక్షకులు తన సినిమాలను ఎంతగానో ఆదరిస్తున్నారని, ఇక్కడి వారితో తనకు ప్రత్యేకమైన అనుబంధం ఉందని విజయ్ అప్పట్లో చెప్పారు. తన స్పీచ్ మొత్తం తెలుగులోనే కొనసాగించేందుకు ప్రయత్నించిన ఆయన, మధ్య మధ్యలో తెలుగు పదాలను స్పష్టంగా పలకడం అభిమానులను ఆకట్టుకుంది.

ఆ సమయంలో విజయ్ మాట్లాడుతూ.. "నాకు తెలుగు చాలా ఇష్టం. తెలుగు ప్రేక్షకులు ఎప్పుడూ నాకు ఎంతో ప్రేమ ఇచ్చారు. అందుకే నేను తెలుగులో మాట్లాడాలని మళ్లీ ప్రయత్నించాను" అంటూ చెప్పిన మాటలు ఇప్పుడు వైరల్ అవుతున్నాయి. ముఖ్యంగా తమిళ రాజకీయాల్లో కీలక నేతగా ఎదిగిన ఈ వీడియో బయటకు రావడంతో సోషల్ మీడియాలో భారీ చర్చ మొదలైంది. ఇక సినిమా గ్లామర్‌తో రాజకీయాల్లోకి వచ్చి, పక్కా ప్రణాళికతో విజయం సాధించిన విజయ్ ఇప్పుడు అసలైన సవాల్‌ను ఎదుర్కోబోతున్నారు. ఎన్టీఆర్, ఎంజీఆర్ లాగా ఆయన కూడా ప్రజల గుండెల్లో నిలిచిపోయే పాలన అందిస్తారని ప్రతి ఒక్కరూ ఆశిస్తున్నారు. దళపతిగా మొదలైన ఈ ప్రయాణం, జన నాయకుడిగా ఏ స్థాయికి చేరుతుందో చూడాలి.