భారతదేశం
ఓయి-లింగారెడ్డి గజ్జల
తమిళనాడు అసెంబ్లీ ఎన్నికలు సమీపిస్తున్న వేళ, రాజకీయ క్షేత్రంలో పాగా వేయాలని చూస్తున్న దళపతి విజయ్కు మరోమారు గట్టి ఎదురుదెబ్బ తగిలింది. విజయ్ ప్రకటనని ‘తమిళగ వెట్రి కజగం’ (TVK) పార్టీకి ఇప్పటివరకు నిలిచిన జైనుద్దీన్ నాయకత్వంలోని ‘ముస్లిం మక్కల్ కజగం’ కీలక నిర్ణయం తీసుకుంది. టీవీకేతో తమ బంధాన్ని తెంచుకుంటున్నట్లు ఆ సంస్థ అధికారికంగా ప్రకటించడంతో ఒక్కసారిగా సమీకరణలు మారిపోయాయి.
ఈ రాజకీయ విడాకులకు పునాది పడింది ‘జననాయకన్’ అనే సినిమాతో. ఈ చిత్రానికి సంబంధించిన ఒక వీడియో నెట్టింట లీక్ కావడంతో వివాదం మొదలైంది. ఆ వీడియోలో ముస్లింలను ప్రతికూలంగా, అభ్యంతరకర రీతిలో చిత్రీకరించారనే ఆరోపణలు వెల్లువెత్తాయి. ఆ చిత్ర నిర్మాణంలో గానీ, దాని వెనుక ఉన్న శక్తితో గానీ విజయ్ పార్టీకి ఉన్న నేపథ్యంలో ముస్లిం మక్కల్ కజగం తీవ్ర అసహనం వ్యక్తం చేసింది. తమ సామాజిక వర్గ మనోభావాలను దెబ్బతీసే విధంగా ఉన్న చిత్రాలను ప్రోత్సహించే వారితో కలిసే ప్రసక్తే లేదని స్పష్టం చేసింది.
ఎన్నికల ముంగిట భారీ డ్యామేజ్?
తమిళనాడులో మైనారిటీ ఓటు బ్యాంకు ఎప్పుడూ నిర్ణయాత్మక శక్తిగా ఉంటుంది. విజయ్ పార్టీని క్షేత్రస్థాయిలో బలోపేతం చేయడం మైనారిటీ సంస్థల మద్దతు చాలా అవసరం. ఇలాంటి తరుణంలో MMK వంటి సంస్థ మద్దతు ఉపసంహరించుకోవడం విజయ్ రాజకీయ ప్రయాణంపై ప్రభావం చూపుతుంది. ముస్లింలను నెగటివ్గా చూపిస్తున్నారనే ముద్ర పడటం టీవీకే ఇమేజ్కు పెద్ద మైనస్గా మారే ప్రమాదం ఉంది. ఇప్పటికే ప్రత్యర్థి పార్టీలు దీనిని రాజకీయం చేసేందుకు సిద్ధమవుతున్నాయి.
విజయ్ తర్వాత అడుగు ఏంటి?
సినిమా రాజకీయాల్లోకి చొచ్చుకురావడం విజయ్కు కొత్తేమీ కాదు. అయితే ఇప్పుడు ఆయన కేవలం నటుడు మాత్రమే కాదు, ఒక రాజకీయ పార్టీ అధినేత. ‘జననాయకుడు’ చుట్టూ జరుగుతున్న ప్రచారాన్ని విజయ్ ఎలా తిప్పికొడతారు? మళ్ళీ ముస్లిం మక్కల్ కజగం నమ్మకాన్ని ఎలా చూరగొంటారు అన్నది ఇప్పుడు ఆసక్తికరంగా మారింది. పార్టీలు ఈ వివాదంపై క్లారిటీ ఇచ్చే ప్రయత్నం చేస్తున్నప్పటికీ, లీక్ అయిన వీడియో సోషల్ మీడియాలో వైరల్ కావడం టీవీకే వర్గాల్లో ఆందోళన కలిగిస్తోంది.
సినిమా గ్లామర్ ఒకవైపు, రాజకీయ వాస్తవాలు మరో వైపు.. ఈ మధ్య దళపతి విజయ్ ఎలా బ్యాలెన్స్ చేస్తారనేది ఇప్పుడు తమిళ రాజకీయాల్లో అతిపెద్ద ప్రశ్న.
